नवी मुंबईतील काही भाग जलमय; प्रशासनाची यंत्रणा सतर्क
तुषार पाटील
नवी मुंबई: 19 ऑगस्ट 2025 रोजी ठाणे जिल्ह्यासाठी जाहीर करण्यात आलेल्या ‘रेड अलर्ट’च्या पार्श्वभूमीवर, नवी मुंबईला रात्रभर अतिवृष्टीने अक्षरशः झोडपून काढले. या मुसळधार पावसामुळे शहराच्या काही सखल भागांमध्ये पाणी साचले, तरीही नवी मुंबईचे जनजीवन इतर शहरांच्या तुलनेत सुरळीत राहिले. या परिस्थितीत नवी मुंबई महानगरपालिका (NMMC) आणि त्यांची आपत्कालीन यंत्रणा पूर्णपणे सज्ज असून, मदतकार्य वेगाने सुरू आहे.
इंटिग्रेटेड कमांड कंट्रोल सेंटर एक्टिव्ह the municipal corporation is ready
महापालिका आयुक्त डॉ. कैलाश शिंदे स्वतः परिस्थितीवर लक्ष ठेवून आहेत. त्यांनी पहाटेच महापालिका मुख्यालयातील अत्याधुनिक ‘इंटिग्रेटेड कमांड कंट्रोल सेंटर’ (ICCC) ला भेट देऊन शहरातील विविध ठिकाणच्या स्थितीची पाहणी केली. ICCC मधील सीसीटीव्ही कॅमेऱ्यांच्या मदतीने संपूर्ण शहरावर बारकाईने नियंत्रण ठेवले जात आहे. आयुक्तांनी संबंधित अधिकाऱ्यांना तातडीने उपाययोजना करण्याचे निर्देश दिले आहेत.
पावसाची आकडेवारी आणि सद्यस्थिती
गेल्या 24 तासांत (18 ऑगस्ट सकाळी 8:30 ते 19 ऑगस्ट सकाळी 8:30 पर्यंत) नवी मुंबईत 185.02 मिमी पावसाची नोंद झाली, तर आज सकाळी 8:30 ते सायंकाळी 4:30 पर्यंत आणखी 89.56 मिमी पाऊस पडला. कमी वेळेत जास्त पाऊस झाल्याने अनेक सखल भागांत पाणी साचले. मात्र, महापालिकेने पाण्याचा निचरा करण्यासाठी अतिरिक्त पंप लावले आणि पाणी वाहून जाण्यास अडथळे ठरणाऱ्या गोष्टी तात्काळ दूर केल्या.
गेल्या पाच दिवसांपासून (15 ऑगस्टपासून) शहरात एकूण 540.57 मिमी पर्जन्यवृष्टी झाली आहे. समुद्रसपाटीपासून खाली वसलेले शहर असल्याने भरतीच्या वेळी, विशेषतः सकाळी 9:15 वाजता आलेल्या 3.75 मीटर उंचीच्या भरतीमुळे काही ठिकाणी पाणी साचले.
मदतकार्य आणि स्थलांतर
महापालिका आपत्कालीन यंत्रणा सर्व आठही विभाग कार्यालयांमध्ये सतर्कतेने कार्यरत आहे. त्यांनी तात्काळ मदतकार्याला सुरुवात केली आहे:
- यादवनगर आणि ट्रक टर्मिनल: डोंगरावरून येणारे पाणी रोखण्यासाठी जेसीबी लावून तात्पुरता बांध घातला गेला.
- तुर्भे एमआयडीसी आणि इतर भाग: पाणी साचलेल्या ठिकाणी जेसीबीच्या मदतीने ढिगारे (debris) हटवून पाण्याचा प्रवाह मोकळा केला.
- अंडरपास आणि सखल भाग: कोपरखैरणे, घणसोली, सानपाडा-जुईनगर आणि रबाळे येथील अंडरपासमध्ये साचलेल्या पाण्याचा निचरा करण्यासाठी पंपांची संख्या वाढवण्यात आली.
बचावकार्ये आणि सतर्कता
अग्निशमन दलाच्या जवानांनी अनेक महत्त्वपूर्ण बचावकार्य यशस्वी केले. कोपरखैरणे-महापे अंडरपासमध्ये पाण्यात अडकलेल्या स्कॉर्पिओ आणि बसमधील 5 व्यक्तींना सुखरूप बाहेर काढण्यात आले. तसेच, ठाणे-बेलापूर रस्त्यावरील एका नाल्यात वाहून जाणाऱ्या म्हशीलाही वाचवण्यात यश आले.
या अतिवृष्टीमुळे तुर्भे येथील कृष्णा स्टील झोपडपट्टी भागातील 90 हून अधिक नागरिकांचे स्थलांतर बाजूच्या गामी कंपनीत करण्यात आले आहे. त्यांच्यासाठी जेवणाची व्यवस्थाही करण्यात आली आहे.
शाळा आणि कार्यालये बंद
ठाणे जिल्ह्याला ‘रेड अलर्ट’ जाहीर झाल्यामुळे खबरदारीचा उपाय म्हणून 19 ऑगस्ट रोजी नवी मुंबईतील सर्व शाळा बंद ठेवण्याचे आदेश आधीच जारी करण्यात आले होते. तसेच, जिल्हाधिकाऱ्यांच्या सूचनेनुसार, अत्यावश्यक सेवा वगळता महापालिकेच्या इतर कर्मचाऱ्यांना दुपारनंतर सुट्टी देण्यात आली आहे. त्यांना ‘ई-ऑफिस’ प्रणालीद्वारे घरून काम करण्यास सांगण्यात आले आहे.
मोरबे धरणाची स्थिती
महापालिकेच्या अखत्यारीत येणाऱ्या मोरबे धरण क्षेत्रातही मोठा पाऊस झाला आहे. आज सकाळी 8:30 ते दुपारी 3:30 या वेळेत 98.80 मिमी पर्जन्यवृष्टीची नोंद झाली. धरणाची पातळी 88 मीटर कमाल क्षमतेपैकी 86.95 मीटरपर्यंत पोहोचली आहे.
नागरिकांना आवाहन
हवामान विभागाने 20 ऑगस्टसाठी ‘ऑरेंज अलर्ट’ जाहीर केला असल्याने नागरिकांनी स्वतःची काळजी घ्यावी आणि अत्यावश्यक काम असल्यासच घराबाहेर पडावे, असे आवाहन महापालिका आयुक्तांनी केले आहे. कोणत्याही मदतीसाठी घाबरून न जाता जवळच्या विभाग कार्यालयातील आपत्कालीन कक्षाशी, किंवा महापालिका मुख्यालयाच्या मध्यवर्ती नियंत्रण कक्षाशी 27567060 / 27567061 या क्रमांकावर, तसेच टोल-फ्री क्रमांक 1800222309 / 2310 वर संपर्क साधावा, असे डॉ. शिंदे यांनी सांगितले.
